మళ్లీ భగ్గుమన్న బంగారం ధర.. రెండు రోజుల్లో రూ. 1500 పెరుగుదల

8:36 pm, Tue, 18 August 20

ముంబై: బంగారం, వెండి ధరలు మళ్లీ కొండెక్కాయి. గతవారం దిగివచ్చిన ధరలకు మళ్లీ రెక్కలొచ్చాయి. గత రెండు రోజుల్లో 10 గ్రాముల బంగారం రూ. 1500 పెరగ్గా, కిలో వెండి ధర ఏకంగా రూ. 3 వేలు పెరిగింది.

డాలర్‌ బలహీనపడటంతో పాటు, అమెరికా-చైనా ఉద్రిక్తతలు బంగారానికి డిమాండ్‌ పెంచాయి. కరోనా కేసుల పెరుగుదలతో కూడా ఇన్వెస్టర్లు బంగారంలో పెట్టుబడులకు ఆసక్తి కనబరుస్తున్నారని బులియన్‌ నిపుణులు పేర్కొన్నారు.

ఎంసీఎక్స్‌లో మంగళవారం 10 గ్రాముల బంగారం రూ. 645 పెరిగి రూ. 53,920కు చేరుకుంది. కిలో వెండిపై రూ. 1978 పెరిగి మళ్లీ రూ. 70 వేల మార్క్‌ దాటి రూ. 71,133కు చేరుకుంది.

అమెరికన్‌ డాలర్‌ ఈ వారం కనిష్ట స్థాయిలో పతనమవడంతో అంతర్జాతీయ మార్కెట్‌లో బంగారం ధరలు ఔన్స్‌కు 2000 డాలర్ల మార్క్‌ను తిరిగి చేరాయి.

హువావే టెక్నాలజీస్‌పై అగ్రరాజ్యం అమెరికా తాజా ఆంక్షలతో అమెరికా-చైనా ఉద్రిక్తతలు పెరగడం పసిడి డిమాండ్‌ను పెంచింది.