భారీగా తగ్గిన బంగారం ధర! అక్షయ తృతీయ నేపథ్యంలో కిక్కిరిసిన దుకాణాలు…

1:22 pm, Fri, 3 May 19
Gold price News, Akshaya Tritiya Gold News , Newsxpressonline

ముంబై: అక్షయ తృతీయ దగ్గరకు వచ్చేసింది. ఈ రోజు బంగారం కొనేందుకు చాలా మంది సిద్ధంగా ఉంటారు. అక్షయ తృతీయ రోజున బంగారం కొనుగోలు చేస్తే మంచిదని పెద్దలు చెబుతుంటారు. అందుకే అక్షయ తృతీయ వచ్చిందంటే పసిడి ధర మిలమిలమంటుంది. 

అక్షయ తృతీయ రోజున బంగారం కొనుగోలు చేయాలని భావిస్తున్న వారికి ఒక గుడ్ న్యూస్. బంగారం ధరలు దిగొచ్చాయి. ఫిబ్రవరి నెలలోని గరిష్ట స్థాయి నుంచి చూస్తే ఇప్పటి వరకు బంగారం ధర ఏకంగా 7 శాతం మేర పడిపోయింది.

ఫిబ్రవరి నెలలో పది గ్రాముల బంగారం ధర ఒకానొక సమయంలో రూ.34,830 స్థాయికి వెళ్లింది. అయితే ఇప్పుడు మే 2న బంగారం ధర రూ.32,470 స్థాయికి పడిపోయింది. అంటే బంగారం ధర దాదాపు 7 శాతం దిగొచ్చింది. రూ.2,360 క్షీణించింది.

అక్షయ తృతీయ నేపథ్యంలో బంగారం దిగుమతులు కూడా జోరందుకున్నాయి. మార్చి త్రైమాసికంలో బంగారం దిగుమతులు 20 శాతం పెరుగుదలతో 196.8 టన్నులకు చేరాయి. మే 7న అమ్మకాలు కూడా బాగా పెరగొచ్చని జువెలర్లు విశ్వాసంతో ఉన్నారు.

రానున్న రోజుల్లో బంగారం ధరలు పెరిగే అవకాశముందని నిపుణులు అంచనా వేస్తున్నారు. ప్రపంచ వృద్ధి మందగమనం, సెంట్రల్ బ్యాంకుల బంగారం కొనుగోళ్లు, పండుగలు, పెళ్లిళ్ల సీజన్ వంటి అంశాల నేపథ్యంలో పసిడి మళ్లీ పరుగు పెట్టొచ్చని పేర్కొంటున్నారు.