మీకు తెలుసా?: ఉగాది పర్వదినాన అస్సలు చేయకూడని పనులు…

2:26 pm, Fri, 5 April 19
ugadi-festival

రెండు తెలుగు రాష్ట్రాల ప్రజలు ఏటా ఉగాదిని ఎంతో ఘనంగా జరుపుకుంటారు. ప్రతి సంవత్సరం చైత్ర మాసం శుక్ల పక్షంలో పాడ్యమి రోజున ఉగాది పండుగను జరుపుకుంటారు. తెలుగు వారికి ఉగాది నుండే నూతన సంవత్సరం మొదలవుతుంది.

ఇది తెలుగు వారికి మొదటి పండుగ. ఉగాది రోజున కొత్త పనులు మొదలుపెడతారు. ఈ రోజు పొద్దునే లేచి తల స్నానం చేసి కొత్త బట్టలు వేసుకొని ఉగాది పచ్చడితో పలు కొత్త పనులు ప్రారంబిస్తారు.

నూతన వస్త్రాలు ధరించాలి…

షడ్రుచులతో కలగలిపిన ఉగాది పచ్చడి ఉగాది పండుగకు ప్రత్యేకమైనది. ఉగాది రోజున ఉద‌యం తలకి స్నానం చేసిన త‌రువాత కొత్త వ‌స్ర్తాల‌ను ధ‌రిస్తారు. నూత‌న వ‌స్ర్త ధారణ అనే మాట‌లో ఒక ప్ర‌త్యేకమైన‌ విష‌య‌ముంటుంది. ఉగాది నాడు అంచు కలిగిన‌టువంటి బ‌ట్ట క‌ట్టుకోవాలి.

అంచుక‌లిగిన బ‌ట్ట, ఖండ‌ము కాన‌టువంటి బ‌ట్ట ఏదైతే ఉంటుందో అటువంటి బ‌ట్ట యందు స‌మ‌స్త దేవ‌త‌లంద‌రూ కూడా ఆవ‌హించి ఉంటార‌న్న‌ది వేద‌వాక్కు. వేద‌వాక్కే ప్ర‌మాణ వాక్కు. ఏదైనా ఒక ప‌ని చేయాలి అంటే శాస్ర్తాన్ని ప్ర‌మాణం చేసుకుని చేయాలి.

పంచాంగ శ్రవణం, ఉగాది పచ్చడి…

అలాగే కొత్త వస్ర్తాలతో దేవునికి పూజ చేస్తే చాలా మంచిది. అలాగే ఉగాది రోజున అందరూ పంచాంగ శ్రవణం చేస్తారు. ఉగాది పచ్చడి సేవించిన తరువాత కుల దేవతలకు భక్షాలు, చిత్రాన్నం సమర్పించాలి.

వేసవి తాపాన్ని ఉపసమింప చేయడానికి వడపప్పు పానకం కూడా ఉంచి తప్పకుండ స్వీకరించాలి.లక్ష్మి పూజ చేసి దానాలు చెయ్యాలి. మీ శక్తిమేరకు దానాలు చేయవచ్చు.

ఇలా మీరు చేయగలిగినంత దానం మీరు చేయడం వలన మీకు శుభం కలుగుతుంది. మీరు చేసిన ఆ దానం మీకు ధన లాభాన్ని తెచ్చిపెడుతుంది, అంతేకాకుండా పుణ్యం కూడా లభిస్తుంది.

కొన్ని పనులు చేయకూడదు…

ఇకపోతే ఉగాది పండుగ రోజున చేయకూడని పనులు కూడా చాలానే ఉన్నాయి. అందులో మొదటిది దక్షణ ముఖాన కూర్చొని పంచాంగ శ్రవణం చేయకూడదు.

ఉగాది రోజున ప్రశాంతంగా ఉంటూ , ఎలాంటి గొడవలు పెట్టుకోకుండా పండుగని సంతోషం గా జరుపుకోవాలి. అలాగే ఉగాది నాడు తప్పనిసరిగా నూతన వస్త్రాలు ధరించాలి. పాత వస్త్రాలు ధరించకూడదు.

మరో ముఖ్యమైన అంశం ఉగాది రోజున మాంసం తినకూడదు. అలాగే మద్యం కూడా సేవించ కూడదు. ఇలా తెలుగు వారి తొలి పండుగ అయిన ఉగాది రోజున ఇవి పాటిస్తే.. మీకు, మీ కుటుంబానికి చాలా మంచిది.