మొత్తానికి మట్టుబెట్టారు.. దూబే హతం.. ఆసుపత్రికి దూబే భార్య, కుమారుడు

3:38 pm, Fri, 10 July 20

 లక్నో: 8 మంది పోలీసులను మట్టుబెట్టిన గ్యాంగ్‌స్టర్ వికాశ్ దూబేను ఎట్టకేలకు హతమయ్యాడు. ఉజ్జయినిలో పోలీసులకు చిక్కిన దూబేను కాన్పూరు తరలిస్తుండగా మార్గమధ్యంలో కారు బోల్తా పడింది. ఇదే అదునుగా భావించిన దూబే పోలీసుల వద్దనున్న 9 ఎంఎం పిస్టల్ తీసుకుని పారిపోయేందుకు ప్రయత్నిస్తుండగా అప్రమత్తమైన పోలీసులు కాల్పులు జరిపారు.

దీంతో దూబే అక్కడికక్కడే ప్రాణాలు కోల్పోయాడు. ఈ ఘటనలో నలుగురు పోలీసులు కూడా గాయపడ్డారు. అనంతరం దూబే మృతదేహాన్ని కాన్పూరులోని ఎల్ఎల్ఆర్ ఆసుపత్రికి తరలించారు. ప్రస్తుతం పోస్టుమార్టం జరుగుతోంది. మరోవైపు దూబే భార్య, కుమారుడు ఆసుపత్రికి చేరుకున్నారు.

జులై 2న కాన్పూరులోని బిక్రూ గ్రామంలో ఉన్న వికాశ్ దూబేను పట్టుకునేందుకు వెళ్లిన పోలీసుల బృందంపై దూబే గ్యాంగ్ కాల్పులు జరిపింది. ఈ కాల్పుల్లో డీఎస్పీ దేవేంద్ర మిశ్రాతో పాటు ముగ్గురు ఎస్‌ఐలను, నలుగురు కానిస్టేబుళ్లు మరణించారు.