రోహిత్ తివారీ హత్య కేసు! భార్య అపూర్వ అరెస్ట్!

3:28 pm, Wed, 24 April 19
rohith-tivari

ఢిల్లీ: ఉమ్మడి ఆంధ్రప్రదేశ్ మాజీ గవర్నర్ ఎన్డీ తివారీ కుమారుడు రోహిత్ శేఖర్‌ తివారి హత్య కేసు కీలక మలుపు తిరిగింది. ఈ కేసులో రోహిత్ భార్య అపూర్వ శుక్లానే నిందితురాలిగా అనుమానిస్తోన్న పోలీసులు, ఆమెను బుధవారం మధ్యాహ్నం అరెస్ట్ చేశారు. రోహిత్‌ది తొలుత సహజమరణంగా భావించినా, పోస్ట్‌మార్టం నివేదికలో హత్యగా తేలింది.

దీంతో హత్య కేసు నమోదుచేసిన పోలీసులు, దీనిని క్రైం బ్రాంచ్‌కు అప్పగించారు. రంగంలోకి దిగిన క్రైం బ్రాంచ్ విచారణ వేగవంతం చేసింది. దర్యాప్తులో భాగంగా అపూర్వను మూడు రోజుల పాటు వివిధ కోణాల్లో విచారించిన పోలీసులు, చివరకు ఆమే ఈ హత్యకు పాల్పడినట్టు నిర్ధరణకు వచ్చారు.

రోహిత్ తల్లి ఉజ్వల సైతం, తన కుమారుడు, అపూర్వల వైవాహిక జీవితం కూడా సాఫీగా సాగడంలేదని, రోజూ గొడవలు పడుతూ ఉండేవారని పోలీసులకు చెప్పడంతో ఆ కోణం ప్రశ్నించారు. చివరకు ఆమె అసలు నిజం అంగీకరించినట్టు భోగట్టా. మద్యం మత్తులో ఉన్న రోహిత్‌ ముఖంపై తానే దిండుతో అదిమి ఊపిరాడకుండా చేసి హత్యచేశానని చెప్పినట్టు తెలుస్తోంది.

ఉత్తరాఖండ్‌కు వెళ్లిన రోహిత్ ఏప్రిల్ 15 అంటే చనిపోయే ముందు రోజు ఢిల్లీకి వచ్చారు. అర్ధరాత్రి ఫుల్లుగా మద్యం సేవించి ఇంటికొచ్చినట్టు ఆయన నివాసం వద్ద సీసీటీవీ ఫుటేజ్‌ ద్వారా గుర్తించారు. మద్యం మత్తులో తూలుతూ వచ్చిన రోహిత్‌ను హత్యచేయడానికి ఇదే సరైన సమయమని అపూర్వ భావించింది. ఆయన తన గదిలో నిద్రపోతుండగా దిండుతో అదిమి ఊపిరాడకుండా చేసిందని, దీనికి చెఫ్ అఖిలేశ్, పని మనిషి గోలు సాయం తీసుకున్నట్టు పోలీసులు తెలిపారు.

అలాగే ఈ హత్య కేసులో నిందితుల పాత్రపై ఫోరెన్సిక్ నివేదిక కోసం ఎదురుచూస్తున్నట్టు వెల్లడించారు. హత్య జరిగిన ఢిల్లీ డిఫెన్స్ కాలనీ భవనం మొదటి అంతస్తులోని సీసీటీవీ ఫుటేజ్‌లో ముగ్గురు నిందితులు రోహిత్ గదిలోకి వెళ్లినట్టు రూఢి అయ్యిందని ఓ పోలీస్ అధికారి పేర్కొన్నారు. తమ ఆస్తిని సొంతం చేసుకోవాలని అపూర్వ, ఆమె కుటుంబం నిరంతరం ప్రయత్నిస్తోందని రోహిత్ తల్లి ఉజ్వల పలుమార్లు ఆరోపించారు.