కోటి రూపాయలు బుగ్గి చేసిన ఎలుక.. ఆరు నెలల తర్వాత వెలుగులోకి!

9:30 am, Fri, 21 August 20

హైదరాబాద్: ముషీరాబాద్‌లోని ‘మిత్రా మోటార్స్’లో ఈ ఏడాది ఫిబ్రవరి 8న జరిగిన అగ్నిప్రమాదానికి ఓ చిన్న ఎలుక కారణమని ఫోరెన్సిక్ సంస్థ విచారణలో వెల్లడి కావడం అందరినీ షాక్‌కు గురిచేస్తోంది.

మిత్రా మోటార్స్‌లో అర్ధరాత్రి దాటిన తర్వాత సంభవించిన అగ్నిప్రమాదంలో మూడు కార్లు, ఫర్నిచర్ కాలిబూడియ్యాయి. దాదాపు కోటి రూపాయలకు పైగా నష్టం వాటిల్లింది.

ఈ ఘటనపై కేసు నమోదు చేసుకున్న పోలీసులు ప్రమాదానికి షార్ట్ సర్క్యూటే కారణమంటూ కేసును మూసివేశారు.

అయితే, ఈ ప్రమాదానికి షార్ట్ సర్క్యూట్ కారణం కాదని, ఓ ఎలుకే నిప్పు పెట్టిందని ట్రూత్ ల్యాబ్స్ ఫోరెన్సిక్ సంస్థ విచారణలో బయటపడింది.

సీసీటీవీ ఫుటేజీలను గమనించిన అనంతరం ఈ విషయాన్ని నిర్ధారించింది. దాదాపు ఆరు నెలల తర్వాత ప్రమాదానికి గల అసలు కారణం తెలియడం గమనార్హం.

ఫిబ్రవరి ఏడో తేదీన ఉదయం 10 గంటల సమయంలో కంపెనీ ఉద్యోగి ఒకరు దేవుడి పటం ముందు దీపం వెలిగించి పూజ చేశాడు.

ఆ గదిలోకి గాలి అంతగా ప్రసరించే అవకాశం లేకపోవడంతో ఆ దీపం రాత్రి వరకు వెలుగుతూనే ఉంది. రాత్రి 11:51 గంటల సమయంలో ఓ ఎలుక నిప్పులాంటి వస్తువును పట్టుకుని టేబుల్‌పై కనిపించింది.

దాని నోటిలో ఉన్నది దీపం వత్తేనని నిర్ధారించారు. ఆ తర్వాత ఆ వొత్తిని అది కుర్చీపై జారవిడిచింది. ఆ కుర్చీలు రివాల్వింగ్ చైర్లు కావడం, స్పాంజ్ వంటి తొందరగా అంటుకునే గుణం ఉండడంతో వెంటనే మంటలు చెలరేగాయి.

క్షణాల్లోనే మంటలు ఎగసిపడి కింది ఫ్లోర్‌లోకి ప్రవేశించాయి. అక్కడ ఫర్నిచర్‌తోపాటు మరమ్మతు కోసం ఉంచిన మూడు కార్లు కాలి బూడదయ్యాయి.

ఓ చిన్న ఎలుక ఇంతటి ప్రమాదానికి కారణమైందన్న విషయం తెలిసి అందరూ విస్తుపోతున్నారు.